淋巴同水腫有咩關係？

唔知點解，明明係瘦底，個人都經常腫腫脹脹？
唔知點解，明明已經好努力減肥，身形都係忽肥忽瘦？
唔知點解，明明只係飲水，都覺得自己又肥左？
唔知點解，身體某啲位無啦啦特別浮腫，有時摸落去仲硬硬地？
如果你發現自己有以上問題，就要評估下會唔會係淋巴問題喇！

淋巴同水腫有咩關係？

當淋巴系統運作唔暢順，甚至阻塞，唔能夠充分發揮作用，將淋巴液排出手臂、腿、頸或身體其他部份時，淋巴液就會係身體組織入面累積，令身體易出現腫脹、水腫，更甚者身體組織可能會增厚同變硬。

淋巴呢個詞相信大家都唔多唔少有聽聞過，但實際上又知唔知佢究竟係乜？

咩係淋巴？

淋巴系統由淋巴管、淋巴液及淋巴結組成，分佈全身。含有蛋白質、水份、脂肪等體液嘅淋巴液會經由貼近血管嘅淋巴管道流動，被運送到淋巴結，淋巴結就負責同淋巴液入面有害的細菌及病毒打仗，將佢地過濾及消滅，保護身體免受感染。我地全身有成1000粒淋巴結，主要集中係關節位，例如腋下、腹股溝、腹部、胸部和頸的周圍，部分都摸得到添！ 

如果察覺到自己有輕微嘅淋巴水腫，又有咩方法可以幫到手？其實坊間唔少美容院都有幫人通淋巴嘅服務，不過下下都去美容院，要花時間又要洗錢，都幾係野。今次就分享簡單到係屋企都做到嘅通淋巴方法——按摩！適當嘅按摩可以保持淋巴通暢、令血液循環變得更好、有助代謝老舊角質、消除浮腫。

• 小腿按摩：雙手抓住小腿肚肌肉，用手指公輕輕由腳踝開始捏到膝頭哥後方；雙手捉住膝頭哥，手指公以外嘅4隻手指指頭輕輕按壓膝頭後側

• 大腿按摩：由膝頭哥以上嘅大腿外側位置，S型咁慢慢揉按到臀部，手法有啲似大家平時擰毛巾；雙手捉住大腿，由膝蓋開始用手指公輕按大腿中央，直到根部

• 面部按摩：雙手從下巴開始，輕輕向上向耳朵方向推

其實淋巴塞問題可大可小，影響身形嘅美觀度事小，仲可能係身體健康響起嘅警號，所以大家如果覺得水腫情況已經好嚴重，記得睇醫生最重要！